經歷

在經歷近乎兩年同MDD嘅對抗之後,我相信自己已經開始行出呢一個陰霾,我唔會用「痊愈」嚟形容自己,因為自己同時有BPDPDD,憂鬱嘅心情常在,只係變得冇咁強烈咁解,但其實已經係一個進展,至少回復到未醞釀成MDD嘅時候,雖然將來係有機會復發(同以我所知機率唔細),但其實喺呢段時間都學識咗唔少嘢,亦因為咁,先無負我呢兩年嘅光陰。

呢一段時間入面,我學識咗「放低」,或者對於BPD嘅患者而言,或者係對於金牛座嘅我而言,「固執」呢一樣嘢總係長埋喺我嘅性格入面,但呢段時間嘅經歷,話咗俾我知,唔會所有嘢都盡善盡美,難保所有事都符合我嘅預期,即使最終結果唔如意,都唔需要執着過去,發生咗嘅就由得佢發生,喺發生之後接受改變,然後再次上路,固然,面對唔如意嘅事會唔開心,但唔開心嘅時間都遠比以前為短,或者係因為我已經習慣咗點樣去面對失意。

以前成日會諗,「如果可以返去以前,冇做到呢樣嗰樣就好」或者「早知⋯」,但依家會move on得更快,更積極咁去諗之後instead of停滯不前,學識喺唔好嘅事入面睇到佢好嘅地方,或者呢啲就叫積極。

我相信經過每一次嘅試煉之後,我哋都可以變成更強、更無畏嘅人,每一道嘅經歷都可以成就我哋更好嘅將來,而抑鬱嘅經歷亦都令到我能夠更理解其他人心目中嘅諗法、更有同理心、更容易同人溝通,或者宏觀嚟睇,其實雖然我呢兩年失去嘅唔少,但亦都學識唔少,識到好多有趣嘅人,學識放膽表達自己嘅想法,呢一切嘅得着,早就超越我失去嘅嘢,亦因為咁,我會覺得自己冇辜負到呢一段嘅日子。