恨怨

「幸福的人用童年去治癒一生,不幸的人用一生去治癒童年」

當然,我不幸地屬於後者,但經歷更多嘅事情之後,我已經蛻變成一個看淡一切嘅人。

或者係以前年少無知,或者係每一個小朋友都會經歷嘅階段,好鍾意同人比較呢樣嗰樣,係嘅,我以前都好鍾意同人去比較,特別係我呢一啲網絡原生代,智能電話啱啱興起嘅年代,呢一啲比較真係特別強。以前嘅我成日喺social media上面見到唔同人去唔知邊度chill,我總係會好羡慕,皆因,喺我成長嘅過程中,近乎係冇娛樂嘅機會。當年個個用晒智能電話嘅年代,我就仲係用緊Nokia,父母嘅管教模式係嗰一種專制、唔會理你想要啲咩嘅嗰一種,成長嘅時候一路有種肉隨胋板上嘅感覺,成日會怨,點解我嘅人生好似一直都唔到自己話事,點解我會生於呢一個家庭,點解我會存在於呢個世界上面,所以咁講,我由好細個已經有輕生嘅念頭,雖然當時意識唔到係一個咩問題,但或者基於本能嘅關係,我都一直將呢一啲諗法收收埋埋,唔敢同任何人講,又或者係咁講,係根本冇打算過去表達自己。

老實講,雖然我嘅物質生活比起好多人富足,但以前嘅自己就係好似一路都唔滿足,又或者,其實係因為缺乏精神上嘅關心而所產生嘅一種compremise嘅心態,畢竟,喺我嘅成長入面,老豆老母就係只係會打、鬧、罰,我哋心靈上嘅交流應該喺我幾近十八年嘅人生入面加埋晒都唔會超過一個鐘,當然,家庭管教模式同溝通背景都影響我至今,極度唔相信父母同好易依附其他外人,probably, that's how my BPD happen。

曾經嘅我會埋怨,點解我會係嗰種不幸嘅人?但年紀漸大之後,個人都越睇越開。

有時,幸福與唔幸福,或者都只係一個相對嘅概念,固然,我哋係一群唔幸福嘅人,但冇辦法,既然兩者係與之相對嘅,自然有幸福嘅人同唔幸福嘅人,要出現喺我身上,其實我都冇辦法,呢啲事,始終都要有人嚟承擔。

雖然依家嘅生活好似好成功咁,我又好似冇再怨天尤人,但我真係放得開嗎?我都唔知。

我只知道,呢一啲經歷係會影響我嘅一生,影響我待人處事嘅方式,並引嚟更多嘅悲劇。

我一路都好驚俾人離棄,甚至係用盡我一切嘅能力去阻止呢一件事發生,但偏偏,呢一啲事卻不斷喺我嘅生命中出現,呢一啲,係天意還是偶然?