荒謬

我哋對於所追求嘅普世價值,似乎係所有人都有一個共識,就係「自由、民主、平等」,即使獨裁國家都會用「民主」一詞嚟包裝自己,可見其實佢哋都深深明白到人類對於「民主」嘅追求,只係佢哋唔肯面對現實咁解。例如民主指數最低(應該係,可能不會找到最低,最多只有更低)嘅北韓國名全稱都叫朝鮮民主主義人民共和國,前東德都叫民主德國(DDR),不過縱觀歷史上,個國名入面有「人民」、「民主」一詞嘅國家通常都係最獨裁嗰一啲嚟,因為通常係共產國家,反而「民國」通常會比較民主(現今社會,以前嘅各大「民國」都係獨裁anyway)

但唔知點解,我哋一路強調對「民主」嘅追求,一路講「民主」嘅重要性,但獨裁嘅思想同行為似乎卻一路向世界蔓延開嚟,當中最大嘅因素係因為獨裁國家開始走入世界舞台有關。西方嘅國家早喺冷戰時代為咗抗衡蘇聯而選擇同中國靠近,放鬆對中國嘅禁運同制裁,令到中國有機會坐大,以為中國有咗錢之後會改變咩?可惜中國愚民太多,普遍人選擇附和政權,再加埋本身民族對於皇權嘅崇拜,相信對外擴張(自古以嚟乜乜叉叉)嘅帝國主義思想,使得「民主」呢一個觀念喺呢一片土地上幾乎冇發芽嘅可能(難,但唔係冇)。但正因為當年西方國家對中共有著過份欒觀嘅期望,令到全人類要承受呢一個惡果,世界又走返去嗰個同獨裁、主張對外擴張嘅政權去鬥嘅年代。

中國有咗錢之後唔係做咩正義轉型,反而係開發各種唔同嘅技術去監控其他人,聘請黑客去竊取其他國家嘅機密(軍事、以至近期嘅疫苗),意圖控制整個世界,呢一切都正正喺呢一個世界發生緊,監控技術用嚟監控維吾爾人、藏人,甚至用相關嘅技術出口到外國順手用後門程式嚟收集情報資訊,用網絡審查嘅技術嚟幫其他「志同道合」嘅政權去篩選走唔合政權心意嘅言論,顯然中國對於世界嘅和平、民主嘅倒退發揮住一個重大嘅作用,亦係點解西方國家要重視。

但最離奇嘅係,西方國家,傳統上最講求「民主」、「自由」嘅國家一路對於中國嘅行徑係選擇坐視不理,好大嘅原因係因為中國坐大咗之後利用各式嘅交易、買賣嚟籠絡人心,舉個例,中資企業擁有葡萄牙唔少同民生有關嘅業務,包括電力公司,當然,呢一件事亦同歐盟當初要葡萄牙賤賣家產還債有關,為咗攞返放出去嘅債,而令到自己一路俾中國摙住春袋咁講乜都驚得罪佢,甚至乎喺關鍵嘅時刻選擇同獨裁國家企喺同一邊,其實係咪有啲反智兼且得不償失呢?

我哋從前相信嘅普世價值,係咪會被獨裁所取代呢?我哋嘅將來,又係咪要活喺恐懼之中呢?