墮落

睇著形勢發展落去,都可以見到香港正係一步一步咁被港共政府推向緊萬丈深淵,從前香港引以為傲嘅嘢統統消失,雖然可以話係意料之內,但港共政府以至中共政府都只係一味「卸膊」,將香港「殞落」嘅責任推去其他人身上。

1984年所承諾嘅「一國兩制」,如今變成點嘅樣?所有北京想香港做嘅事唔能夠喺香港本地做到嘅就會由北京直接頒令,直接改咩基本法附件。藍絲成日話咩「多得泛民先逼到『阿爺』出手」,簡直係荒天下之大謬,公我贏字你輸,表面上扮到好似好民主,但暗啞底有晒自己嘅計劃,一同自己嘅計劃有出入就直接干預,何來自治?所以根本唔在於邊個逼邊個出手,而係一切已經有晒內定嘅結局,藍絲喺度spin呢樣spin嗰樣,實質責任其實一直都喺中共手上,因為「自治」從來都只係一個煙幕。

不過呢個煙幕喺港人開始覺悟、反對嘅時候開始連樣都索性唔做,北京講一句,港共即刻照跟,正如中國對BBC嘅「封殺」,港共即刻話要跟,而北京當局一直用「港人治港,高度自治」作為宣傳口號,簡直係對「自治」兩個字極大嘅侮辱,不過都唔出奇嘅,共產黨人文化水平惡劣,唔能夠理解中文字箇中嘅含義,亦係意料中事。

港共政府成日吹噓話香港幾咁「自由」,但睇嚟之後都冇得再用呢啲稱謂嚟自居,皆因一切俾外人睇嘅幻象同煙幕都已經俾中共同港共自己親手劃破咗。因為中國同香港政策異常嘅一致,都已經冇辦法再說服外媒香港係一個擁有「自治」嘅地方,自由經濟體指數將香港除名,以及民主指數嘅暴跌都足以證明香港昔日嘅形象已經完全幻滅,當然,藍絲同中港共或者會繼續沉醉喺自己嘅「Good Old Days」入面,但我要提醒佢哋,人會變,環境會變,時代都會變,你哋一班政府忠實支持者繼續活喺自己(或者係中港共政府)營造出嚟嘅假象入面,唔代表其他人會陪你一齊昏睡,你唔願醒,唔代表全部人都唔願醒,當你發覺身邊嘅人都唔再沉醉喺你所認同嘅嘢身上嘅時候,就應該知道自己係時候醒,不過咁,扮瞓嘅人永遠都冇可能叫得醒。

藍絲們成日話,呢啲一個二個指數嘅目的旨在抺黑中國同香港政府,Well,佢哋有咁嘅諗法都唔出奇嘅,因為佢哋將中囼抺黑外國嗰一套放咗喺外國身上,以為世界同中國一樣一切由政府控制,但其實亦證明咗,佢哋somehow知道中國有幾咁authotarian,只係唔願相信。首先第一個佢哋錯嘅概念,係覺得呢啲指數係外國政府控制,其實做呢啲stats嘅全部都係民間組織,正如外國媒體一樣,完全唔受政府控制,佢哋有絕對嘅編採自由,並冇話係同咩人夾埋做個結果出嚟咁,有唔少外國媒體鍾意同政府唱反調,正如德國都有個奶共基金會講到中國幾咁天花龍鳳,假設呢啲外國民間組織做嘅報告係同政府夾埋做嘅話,嗰啲奶共基金會應該冇可能存在喺呢一個世界上面。並唔係每一個國家都好似中國咁全部都係官媒,社會只有一種聲音而所有嘢都係政府做並且一切都有內定嘅結果,藍絲們唔好成日有種「大中國」思想覺得全世界都同中國一樣。

第二,如果係抺黑中國嘅話,香港嘅排名冇可能喺97至19年期間居高不下。如果呢啲指數旨在抺黑中國,根本唔洗等到今時今日先嚟做,資本同共產陣營嘅對立喺咁多年嚟一直存在,但香港喺自主權移交之後喺榜上面嘅排名都係相當高,甚至以前港共或者中共政府會引述呢啲數據嚟吹噓自己,數據對自己有利就話人哋「公正」,對自己不利就話人哋「抺黑」,呢種做法雖然毫不合理,但活喺呢個時代嘅我哋都對呢種「共產式評價手法」嘅輿論戰都已經見慣不怪。

最近仲想修訂《出入境條例》限制出境,雖然當局話唔會限制港人出境,但港共同中共最擅長「講一套做一套」,我諗大家都一早知㗎啦,法例條文唔洗睇都知有好多可以隨時改變解釋嘅用字,所以反正信與不信嘅權利喺你手上,反正當局預計最快(應該即係最遲)8月1號生效,要走嘅話,好走喇,時間同機會唔會等人㗎。