致 我錯愛過的人

誰亦在反覆錯愛之旅捱大

我個人好鍾意呢一句歌詞,其實喺我真係聽首歌之前已經見過呢一句詞,因為有其他人Quote過呢句做佢social media嘅名,第一次見到已經係明白到嗰種無奈嘅感覺,以致我第一次見到呢一句詞已經愛上咗呢一首歌。(當然首歌本身都好好聽,歡迎大家去聽,利申:打手)

其實我做人嘅時間話短唔短,話長唔長,數數手指都已經有幾近十八年嘅時間,可能我一生入面錯愛太多人,或者係,我根本唔明白咩嘢係愛。

或者,錯愛,都有分錯愛得深、抑或係淺。而我最深刻嘅一次(應該其實都係得一次咁大把),其實可能到依家都未釋懷,或者可能呢一生都唔會。

其實呢一件事suppose已經完結咗年半有多,但時至今日我依然會喺夢入面夢到相關嘅人同事,時刻提醒住我當刻嘅回憶,當時所發生嘅事,不斷喺腦入面講緊自己當時到底係有幾咁蠢,或者呢一切係我大腦嘅自我防衛機制,話俾自己知唔可以容許呢一切再一次發生,如果係咁講嘅話,其實呢一個機制又的而且確係幾有效,至少時刻提醒緊我唔應該對於世界有太大嘅期望。

其實我不必異能大到可扭曲真相改春秋
我只想忘掉你不解這溫柔斷言未接受
能重做時光只需倒流一句話就足夠
尷尬到自己之前吞了「我喜歡你」不開口
十世還做朋友

縱使後悔,但現實往往係無奈,我對於做錯過嘅事並冇挽回、改變嘅餘地,咁係咪代表我應該move on?

我好努力咁去盡量活好每一日,似乎只係為咗同嗰一啲放棄過我嘅人鬥氣,其實有時自己都唔知自己生活係為乜,我唔求生活精采,但求被愛,但其實,愛係啲乜嘢?其實我係咪唔識得點樣去愛?

我要做個放下你的我
苦等某天被前度道賀
可惜笑得比喊痛苦 寧願看不破
我放下你卻未放低我
懦弱還是未能面對可是錯
何苦 還要委屈我

作為一個童年冇感愛到被愛嘅人嚟講,「點樣去愛」、「點為之愛」、「咩係愛」等等嘅問題對於我嚟講都可以算係世紀難題,雖然客觀上我知道身邊有唔少人係「愛」我嘅,但老實講,主觀上嘅我感受唔到,或者我天生冇感受「愛」嘅能力,父母多問一句我會覺得係佢哋嘅控制慾,多年嚟我喺家庭當中所渴望嘅係一個「個人」、「私人」嘅空間,而我嘅性格亦都係做咩都係隨心而唔會想去同任何人交代,而咁樣嘅性格,或者都傷害過唔少「愛」我嘅人,但抱歉,我真係唔明咩為之「愛」。

BPD嘅路縱使會比其他任何嘅人都要經歷更多更密嘅錯愛,甚至一生都搵唔到相愛嘅人,但我仍然會盡我嘅能力去活好我嘅人生,前提係喺我嘅能力入面。

至少,我依然要盡自己最微小嘅力量去改變呢一個荒謬嘅世界。

當然我亦都好感謝嗰一啲咁多年嚟一直聽我訴苦、對我不離不棄嘅人,多謝你哋。