重複

前兩三日嘅我又經歷咗一次Depression Attack(唔知道係咪咁樣叫,不過Anyway都唔係啲咩重要嘅事,暫且當住係咁叫先),成個人維持喺好down嘅狀態,完全冇任何嘅動力,乃至於連食嘢嘅動力都冇埋。

而其實我都對於呢一次嘅attack覺得好困惑,冇任何嘅原因,唔知到底係喺啲咩情況底下trigger到出嚟,不過我諗都唔重要,最重要係當刻嘅感受,嗰一種無力感、同埋黑暗嘅感覺。當刻嘅我總係會將自己收埋喺一個唔開燈嘅房入面,由朝頭早到夜晚,房間嘅環境就隨着日落而變得黑暗,但喺呢種環境,卻最能夠同我內心嘅感受起到共嗚。

每一次心情低落我都係會選擇自己一個人去播一啲慢歌去「同情」自己,的而且確,呢個世界上真係冇乜人明白我諗乜,當然,大致上知我諗乜嘅有幾個,但完全睇得穿我諗乜嘅,真係只有我自己,係嘅,我就係一個唔擅長交際而對身邊所有嘢有太多太多擔心嘅一個人,唔希望其他人費神,唔想影響到身邊嘅人所以選擇自己面對,當然,某程度上都可以話呢一啲嘢係經驗嚟嘅,人生就係咁,每當遇到新嘅嘢都會好主觀咁將自己過往嘅經驗代入上去,即使,自己嘅經驗未必準確。

本來以為自己已經能夠好坦然咁行喺Depression嘅康復之路上面,但經歷每一次不定期發作嘅attack先會知道,原來自己係病得咁深,先會睇到,原來「好返」呢一個情景距離自己係咁遠。

其實我好耐以前已經察覺到自己有Depression㗎喇。唔知大家有冇啲經驗係診所有啲Poster講情緒病嘅呢?我就係憑嗰度列出嘅症狀而知自己有。嗰陣時已經發現自己對發生嘅事同未出現嘅未來有不乎合比例嘅擔心、驚,同埋日常生活經常處於低落嘅狀態,而且係經常感覺到身體有異常嘅痛楚、呼吸唔暢順,呢一啲都係一啲幾明顯嘅症狀,但當然嗰陣我並冇同任何人講過,其中一個原因,係廢事俾人覺得我造作、博同情。嗰陣時,我仲係一個小學生。

去到中三呢個階段,可能係因為對於「揀科」嘅壓力層層逼近,相關嘅症狀日漸加劇,成日俾嗰啲症狀影響日常生活,去咗睇醫生,當然,冇講過自己情緒方面嘅問題,所以又驗血,又睇過心臟科咁,當然係咁都check唔到,記得當時仲俾老豆老母話我「鳩噏」(唔記得exact wording,呢度只係我個人演譯),但相關嘅症狀一直冇停過,雖然我好想搵一個原因俾呢啲症狀,但似乎真係好難搵到。

中四年尾,因為隨着開始有腸胃嘅問題出現,又驗過好多嘢,再結會之前嘅症狀,最終被診斷為depression。喺公立醫院就被診斷為俗稱double depression(PDD+MDD),所以即使熟我嘅人本來都唔會察覺我有啲咁嘅問題面對緊,因為即使我心情差嘅同時工作效率亦係好高。不過其實我又諗,如果我冇depression嘅話,會唔會我嘅工作效率會更高呢,定還是,冇咗depression之後我就唔會再有咁多對人生豐富嘅體會、嗰種細膩嘅情感呢?一切都冇如果,或者,其實目前嘅現狀已經係眾多可能之中最好嘅一個。