世衛調查員只是笑話一則

中國喺過去重金收買非洲(一帶一路),改變世衛代表嘅選舉規則,令到依家個代表上咗台,喺中國爆發疫情之時亦不斷袒護中國,為中國護航,固然佢係造成武肺全球大流行嘅「幕後功臣」之一,但依家又做下樣咁派調查源去中國調查武肺嘅源頭。

數數手指,武肺喺中國開始出現至今已經經歷咗十三個月嘅時間,整整一年有多,代表啲咩?有咩證據都一早消滅晒啦,如果未嘅話,你覺得中國會咁順攤俾人入去咩?仲唔大條道理話你干涉佢內政咩?

再講,若然病毒源頭唔係嚟自中國,咁中國當局都唔洗係咁用假新聞卸膊,首宗感染病毒嘅案例嚟自中國,其他國家頭一批嘅確診者都係嚟自中國,但中國喺過去一年就一時話病毒係美軍帶入中國(首先提得出呢個講法人唔笑狗都吠,美軍最好係入到中國啦),一時又話意大利嚟,再之後又話澳洲嚟,最近仲搞笑,話係外太空嚟,搞搞下又話個病毒同外星文明有關添㗎喇,總之中國嘅立場就係,無論有有查證、科學根據都好,最重要係,衰嘢可以由任何一個國家嚟,又或者外星嚟都得,但一定唔係中國嚟,好嘢就係咪都係中國嘅,當然,我相信中國官方絕對知道病毒嘅來源,但佢哋嘅資訊就係咁,任佢噏。

假設病毒唔係喺中國嚟又點?由一開始佢哋處理嘅態度同當年應對沙士一樣咁惡劣,就算中國唔係造成病毒擴散嘅主謀,都係共犯。歐美國家喺一開始嘅感染個案都有公開,係得中國一路遮遮掩掩,先搞到冇人知病毒嘅存在,令人冇足夠嘅防範,盡早封關,絕對係造成全球大流行嘅一個遠因,固之然歐美鬆散應對,尤其是某啲左膠覺得封關唔好嗰啲人,係造成病毒擴散嘅近因,但若然中國一中公開疫情的話,俾外界知道疫情、病毒嘅嚴重性的話,呢一切都唔會發生,中國對於全球嘅疫情之嚴重、全球人命、經濟損失難辭其咎。

追究中國嘅責任固然重要,但當然唔係派呢個既冇約束力、更加係冇用嘅「專家調查組」去,反正中國一早收埋晒證據,而中國係病毒嘅源頭都係公開嘅秘密,倒不如諗下,極權國家會對人類嘅文明同未來帶嚟咩嘅威脅,再作出相對嘅應對措施。

呢個唔單止係一個國家對其他人嘅人命、經濟所造成嘅損失嘅責任,而係對人類文明嘅威脅。