霎眼間,就已經嚟到2021年喇,我諗除咗我之外,好多人對於2020年嘅感覺都係過得好快,好似咩都冇做過咁就已經過去咗咁樣。係嘅,我都覺得自己嘅2020係咩都冇發生過咁樣,書好似冇咩點讀過,嘢又冇咩點講過,咩都冇咩點做過,就已經話俾我知,我今年要考公開試,其實係一種好唔實在嘅感覺,覺得自己仲未ready去應付考試,之不過,既然都殺到埋身,就算唔ready都要ready啦,畢竟,我對於呢啲事冇選擇嘅餘地,亦都冇咁多嘅時間俾我去虛耗。

理所當然地,我會期望自己喺公開試入面會考到一個好成績,始終即使日子再艱難都好,路係要行嘅,冇一個好成績真係乜都唔使講。入到一間好嘅大學,讀得成書,先能夠做到我自己想做嘅嘢,未必每個人嘅情況好似我咁,但我所識嘅嘢都係需要一個專業資格先有嘢做到。其實有時我覺得好苦惱,明明自己對於我有興趣嘅地方嘅能力係好足夠嘅,但偏偏考呢個公開試就要識埋好多不切實際,與我無關但我需要考得好並且決定我將來的科目。如果喺外國嘅大學睇DSE之餘又會睇嗰一科嘅入學試嘅話,我諗我應該唔洗咁驚,不過無論點都好,世情係咁,外在嘅環境、其他國家、學校嘅制度唔到我去改變,唯有盡力做好自己,呢個係我想要達成自己目標唯一可行嘅方法。

另一件令到我好擔心嘅係,我自己嘅德文能力,畢竟,我啲德文都叫做幾廢下,去到讀全德語授課嘅課堂到底我聽唔聽得明,會唔會讀得好辛苦呢,我真係唔知,亦唔敢想像,不過我都冇想像嘅條件,始終我連想像嘅素材都冇,哈哈。

最大嘅問題係,全球嘅疫情都仲係好大鑊,到底今年航班復飛得未都未成定局,到底疫情可以喺我完成公開試之前完結未都係一個謎,雖然我對呢個結果都冇乜信心㗎喇,畢竟由舊年疫情啱啱開始嗰陣我已經咁望緊嘅時候,到依家都依然仲係咁大鑊,真係唔敢抱太大嘅希望,唯有就係保持樂觀。

因為疫情我失去咗啲咩?一個演唱會、一個旅行、為數唔少嘅上學日(唯然就算有我都未必會返得到學,我身體狀況唔理想)、各種娛樂。

已經好耐冇出過去了,好想有得出返去,好想有得飛,但我喺呢度繼續講都係冇咩意義,還望喺不久嘅將來可以令到疫情受控、消滅呢一個病毒,追究將呢個病毒帶嚟呢個世界嘅國家。

願主與我們同在。