生涯規劃

面對我嘅生活,其實我從來都唔係一個well-planned嘅人,好多時都係一諗到就去做,冇話咩特別plan過咁,好聽啲咁就就叫即興,難聽啲講就叫做冇方向。我係一個好難有啲咩長遠規劃嘅人嚟,一嚟我有興趣嘅嘢成日變,可以話係咩都有啲興趣嘅咁,可能係三分鐘熱度,更多時候係連我自己都唔知道自己想做啲乜。我一個月前對我將來嘅計劃都已經同依家對同一段時間嘅將來嘅規劃有好大嘅差異,雖然整體嘅目標同埋方向叫做係一直都維持一致,但實行嘅方法同預計時間都有好大嘅分別。

講起興趣,固然物理、電子、資訊科技對於我自己會係強項,但其實自己對於飛都有一定嘅熱程,奈何我係唔會記得SOP、會用嘅短語,所以揸飛機可以講話同我無緣,再者我有幾次入院嘅經歷,就算我做到,都唔會有航空公司請我,因為冇一間公司會願以冒險請一個有機會搞到架機墜毀嘅人,可以咁講,我自己有份毀滅我前途嘅選擇。我唯一可以揀嘅,頂多就係做電子工程,喺航空公司入面踎,整啲In-Flight Entertainment嘅啫。

雖然喺呢啲範疇入面我好似勁過我大多數嘅同輩,但憑我預估出嚟嘅DSE成績,有冇大學會收我都係一個問題(香港嘅大學應該唔算難,但德國嘅大學就好難講),我想考入嘅係TUM(慕尼黑工業),但個問題係,佢作為德國最top嘅理科大學,本地競爭已經夠勁,要諗住入到去都可能算係異想天開,畢竟,我理科成績喺校內好,唔等於夠香港數萬考生匹敵,亦未必夠德國呢一個科技大國嘅考生匹敵,更加難同其他嚟自世界各地嘅學生鬥。再講,考嘅除咗係理科之外,仲有嗰堆莫名奇妙嘅必修科,語言科我感覺就冇乜信心㗎嗱,數學嚟講用我啲Calculus嘅水平嚟計數嘅話應該飛機都炒咗幾架。

以前有諗過讀CS,但如果係讀Programming Languages嚟講對我嚟講冇乜用,對我嚟講得學C叫做比較有意義咁樣。雖然我諗都可以上網search然後自學嘅咁,只係睇下自己有冇心同有冇諗到一啲有義意嘅project去做咁解嘅啫,好似python、PHP嗰啲我都係自學翻嚟,當然我諗C嘅syntax會係更加複雜,但我諗有心要學嘅話又唔知難到我嘅(掛)。

依家最大嘅concern係喺德國自己一個人冇friend冇剩點算好嘅啫。

目前打算先喺柏林讀一年Language School先,再報大學睇下邊間收再搬,當然我希望TUM會收我啦,雖然呢個白日夢好似發得有啲大。