論身份認同
話說我喺Instagram見到一個Post載有一本教科書課題為「我是中國人」嘅內容，有感而發。
Ver esta publicação no Instagram
好老實咁講，身份認同嘅嘢從來都係好取決於個人，血緣、政治現實、個人因素、民族認同等唔同嘅因素都可以改變到一個人對於自己身份認同嘅觀點，而事實上，呢一樣嘢亦無對錯之分。
打個比喻，如果我有個美國嘅國籍，而我又愛美國、認同美國嘅文化，鍾意美國人呢一個身份嘅話，當然可以話自己係美國人，因為已經得到咗佢哋政府嘅認可嘛。但當然，你個人唔鍾意美國呢個國家嘅文化、各樣嘢嘅話，大可以話自己唔係美國人，但當然我會覺得你不如先辦理放棄國籍嘅手續（如果你有其他證件並且對該國嘅認同感更強烈並喺一個可行嘅情況底下）。
好喇，雖然口講同埋我哋嘅認知上都知道「身份認同」呢一件事係好主觀亦唔應該有得逼嘅，不過咁，北方中共政權唔知係咪因為知道自己太過乞人憎嘅關係，自香港主權移交以嚟就不斷喺教科書上面滲透一個「我必然係一個中國人」嘅思想俾學生，但都真係幾搞笑，一嚟，都講到，身份認同係一個相當主觀嘅概念，亦能夠隨着時間嘅推移而有所改變，正如蘇聯解體前我哋都唔會對於被蘇聯佔領嘅國家嘅人民有幾咁細分嘅，而佢哋嘅身份認同可以係蘇聯人，亦可以係佢本國（例如烏克蘭）嘅人，呢個概念並唔係固定、封閉嘅，但係咁，中共就一再顛倒人類既有嘅認知，提出咗「你一定係中國人」嘅一個觀點。
至於，佢哋俾人嘅理由其實都係相當站唔住腳嘅（不過以我哋嘅常識都知中共講啲嘢都冇一樣係make sense㗎啦）。
首先，佢話「黃皮膚、黑頭髮、黑眼珠」就叫「中國人」，以咁嘅講法睇嚟「中國人」真係遍佈全球，葡國人無啦無又變咗隸屬「中國人」嘅一個部落、韓國日本收歸中國所有，如果有咁嘅事都真係幾搞笑。
第二，「講『中文』、寫『漢字』就叫中國人」。先唔講粵語同中國嘅官話個差異有幾咁大先，淨係用語言嚟區分呢樣嘢就真係已經笑死人，如果我係一個喺香港長大而一向講開粵語嘅巴基斯坦人，我會唔會話我係中國人？我可能會話自己係「香港人」，因為我喺呢個地方長大，但都真係諗唔到同中國有咩關聯，再講，如果用語言就可以界定到一個人嘅身份、國族認同嘅話，咁係咪我學識講好流利嘅德文，就可以話我係德國人？我父母係澳洲人所以我嘅母語係英語而我會自稱「英國人」、「美國人」？「漢字論」同理，唔通日文入面嘅漢字又要俾人「被中國人」？
相較以上因素，我覺得一個好影響人嘅身份認同嘅因素係文化背景同認同（撇除propaganda嘅影響以外）。香港人（至少係年輕一代）之所以會強調自己係「香港人」而唔係「中國人」，當中一個好重要嘅因素係中港兩地文化背景嘅差異，正如香港人嘅用詞同中國大陸嘅人唔同啦（嘟嘢食、差電、check下等等嘅用詞）、生活習慣唔同啦，正如大家唔會喺行人路度痾屎等等唔同嘅層面。政治因素嚟講，我會覺得係中國想同殖民嘅方式統治香港，而港人對於呢個模式普遍反感而想同中國大陸割蓆。
而我屋企啲長輩成日講咩「我哋中國人點點點」、「唔係中國你會抬得起頭咩」呢啲咁嘅說話，就當然唔關以上所述事，因為佢哋讀過啲主張大中華主義（或者叫「紅底」）學校而植根咗呢一個觀念。而佢哋普遍有個共通點就係，無論中共當局幾咁賤都好，都係會無視，繼續擁護中共政權。從呢個角度嚟睇，中共喺香港嘅滲透其實好成功，雖然我唔認為呢一個成功係一件好事，但的而且確令香港出現好多嘅土生藍絲。
最後嘅係，身份認同嘅嘢就好主觀㗎啫，只要政府認可你（有證件），你覺得你係嗰個國家嘅人咪係囉，唔覺得係咪唔係囉，當然唔覺得係嘅話我都係重覆嗰句，quit國籍啦。
可能你會問，香港人唔鍾意叫自己做「中國人」做咩唔放棄國籍囉。其實都係㗎，不過中國政府既然要將呢一樣嘢強加喺你身上，乜你覺得你可以quit到㗎咩？
正如我之前用外國護照申報國籍變更佢都唔俾我啦。
