白色恐佈

一份完全冇任何民意基礎嘅法律《党安法》（aka 《港区国安法》）喺今年6月30號開始在港實施，淋奠話係要維護國家安全，藍絲同韮菜們都係一直用佢哋嘅官腔統一口徑話香港維護國家安全係天經地義乜乜物物，用「父子」嚟比喻中港關係，更同北京做法相同咁為廣大食客送上「外國乾乳」等等嘅拿手小菜務求塞住全世界人把口。

我並唔認同所謂「父子」係一個適當嘅比喻，因為確切咁睇，香港呢一個地方同中共政權講唔上有任何關係，但就強逼英國交出香港嘅主權，如果我搶你返嚟要你對我俯首稱臣嘅，仲要話我係你老豆點你做呢樣做嗰樣，我諗呢種唔係叫父子關係，而從奴役，甚至更貼切咁講，係綁架。將中共政權同過去曾存在嘅政權嘅歷史混為一談，而我要強調嘅係，中共並唔係中華民國或者大清國嘅合法繼承政權，所以我可以肯定咁話俾你知，中共同香港並冇歷史上嘅關係。

口口聲聲話保持香港嘅生活方式，藍絲照舊將官腔新聞稿Copy and Paste，五毫子就咁袋袋平安，不過依家中國窮，五毫子都唔知俾唔俾得起。

所謂乜自由物自由，依家就同照妖鏡一樣咁，不過點講都冇用，因為藍絲從來唔會同你講理據、講邏輯。

同佢哋講到呢啲嘢就話「政治唔關我事」、「我唔識政治」、「我唔會理政治嘅嘢」、「我唔知道」、「我唔清楚」。

係咁唔關心政治又成日發表咁多偉論？唔啱自己聽嘅就話自己唔識「政治呢啲嘢」，話做好自己要做嘅事就得。

但好遺憾，冇嘢係唔關政治事，正如愛国藍絲最鍾意去外國旅行都關政治事。外國政府認唔認你本護照同俾免簽證待遇你都關政治環境事。

正如共產中國下嘅護照，都唔會有美國免簽，反之，台灣就能夠享有呢個待遇。

提醒一句，人哋嘅簽證政策係人哋國家嘅內政，唔到你「基本法腐乳」。

如果連免簽都係「基本法腐乳」嘅話，我諗係代表中國正式表態話要侵略全世界。

藍絲親戚話党安法唔會影響言論自由喎，我就唔信㗎喇，我就睇下佢幾時言論審查我拉埋我，不過我係唔會怕㗎喇，反正生又好死又好，我並唔在乎，只係去到呢一刻我都要作出一個不自殺聲明，廢事我被自殺之後俾佢哋利用我固有嘅問題大造文章。

我唯一知道嘅係，我哋越驚，中共就越得戚，因為代表佢嘅自色恐佈成功咗。