奇聞共賞：中國不承認外國國籍

唔知道大家仲記唔記得喺2015至2016年間發生咗啲咩事呢？我想講嘅就係銅鑼灣書店事件，瑞典公民桂民海、英國公民李波被擄到中國，當中國當局受到想關國家的批評時，就以「他首先是中國公民」嚟回應，而呢一個回應亦引起咗香港公眾嘅嘩然。

雖然可能好多香港人有非中國嘅國籍，但其實如果你冇主動向入境處去申請「申報國籍變更」，又或者係「放棄中國國籍」的話呢，佢依然會當你係所謂中國公民，照夾你返去。

而對於你本身有冇中國國籍呢樣嘢呢，係好難有定奪嘅，因為條文中有一樣嘢係話「具有中國血統者」，咁即係點？唔好意思，呢樣嘢係冇明確嘅定義，簡單而言，即係當局話你係，你就係。去到呢到真係不禁倒抽一口涼氣。

更離譜嘅嘢都仲有，即係先唔講佢中國血統嘅定義係點，我想去申報國籍變更去放棄中國籍啦，跟住當局嘅答覆係：「中國唔承認葡萄牙⋯⋯乜乜柒柒（下刪三千字）」，咁我都有同佢拗過話喂我個國籍係合法取得嘅你理得我啫，不過佢都話佢係跟指引做，無謂刁難人。

真係搞笑，國籍嘅嘢係人哋別國內政，我只要個國籍有佢嘅合法性，咁所有國家都應該予以承認，呢個亦係聯合國相關條文所寫。

中國作為聯合國嘅會員國，連相關條文所列明嘅義務都未曾執行，仲夠膽走去抽秤其他人，真係搞笑。

一個最唔尊重國際法律嘅國家，竟然係最叻話人唔跟國際法律嘅國家。成件事同一個最唔尊重人權嘅國家批評民主國家唔尊重人權一樣咁好笑。吖，唔記得咗，呢兩個係同一個國家嚟。

呢個國家成日叫人唔好干預佢內政，結果其實係佢最鍾意干預人哋內政，由97年開始唔承認「居英權法案」已經係一個好例子。

而從上述例子已經能夠見到，中國自己自知不受歡迎，所以先要用各種旁門左道去逼你哋要佢個垃圾國籍，你唔想要都要逼你硬食，咁當局就可以隨時將你被消失。

呢樣嘢係乜？是為中國特色也。