教育局：試題沒有討論空間

每一個極權政府都唔會容許人民進行開放嘅討論，因為佢哋唔希望人民有自己嘅思想，只係需要接受成為「國家機器」嘅洗䐉教育。

英國劍橋大學一份出俾GCE嘅試題入面，就曾經叫過考生評價納粹黨對德國、乃至全世界嘅利弊，而英國曾經受到倫敦空襲，死傷慘重，咁倫敦當局有曾經出面話該試題傷害國民感情嗎？佢哋冇，亦都唔會。因為喺西方嘅思想當中，先唔討論政治因素，學生、教師係有佢嘅學術自由。研究該政黨、歷史事件嘅利弊，亦唔代表鼓吹法西斯主義。

而喺咩情況會有政府出面干預學術自由呢？只有一個可能，就係首先當權嘅係一個極權政府，然後佢哋正係企圖掩飾唔想人民知道嘅事實。

當官方所宣傳嘅嘢同事實係有出入嘅話，就唔能夠俾學生去討論，因為當學生一去分析，睇返史實，就會發現同官方宣傳嘅出入同矛盾，進而質而官方嘅講法。

以中國抗戰為例，中共當年同國民黨合作，但佢哋只係喺度隔岸觀火，採取消極抗戰嘅策略，為人所知嘅一句有「七分發展、二分應付、一分抗日」。

打過咁多場勝仗入面，出名而又有共產黨份嘅就只有兩場咁大把，仲要都係喺國軍打到就嚟贏嘅時候先出嚟搶功勞。

喺牆外嘅我哋會知道呢一啲嘅事實。

但係中共政府多年嚟喺嗰啲咩抗戰紀念日上面、自己嘅歷史敎科書入面就講到自己有幾咁多嘅豐功偉績咁，扮到自己嗰陣好憎日本咁，但嗰陣毛澤東仲講咗句「多謝日本」喎，無從抵賴喇掛？

Sorry，當局會話俾你知佢講緊反話。不過咁，當局又點知呢？可能楊焗腸落過地府探毛澤東啦。

所以喺香港係絕對唔能夠討論日本侵華㗎，因為討論完，發現咗事實之後好可能會影響政權嘅認受性，動搖佢嘅合法地位（共產黨有合法過先要報新聞），甚至會引致民族對呢個政黨嘅仇恨，所以先要壓住事實、資訊嘅傳播。

所以呢，國安法要施行就係咁講。

美其名修復國安漏洞，實質為隻手遮天，唔俾後世知道以前發生過啲咩事。

之不過咁，每一個獨裁政權都唔會長命，必然會俾民主政權取諦，只係差在幾時。

當年蘇共倒台，大家都估唔到，唔知未來十年，又會見到啲咩景象呢？