心結

呢一切嘅問題,都似乎終於有一個初步嘅答案。

佢俾我嘅答案係叫「Double Depression」,即係Dysthymia 同埋Major Depressive Disorder合併埋一齊。

成長就係咁,有邊一個人喺成長嘅過程中唔係滿身傷㾗?又或者我呢類人係少數啦,因為我喺識嘅人入面十個有九個都係同屋企人嘅關係都幾close,而望返我,我有兄弟姊妹,亦唔係嚟自一啲我哋所謂嘅破碎家庭,但係我嘅成長就係咁樣,好似一個孤兒咁,同屋企人嘅交流可以話係冇。喺我嘅認知入面,屋企人永遠開聲第一句就係想鬧人,或者其實呢個只係我內心嘅恐懼,但呢種嘅恐懼正係源自於我成長嘅經歷。

你嘅教科書、甚至係整個嘅教育制度都係不停咁同我講嗰啲理想中嘅家庭,講咩你嘅父母會點支持你,父母會呢樣會嗰樣。只不過喺我童年嘅係咩?父母只係對自己一個又一個嘅枷鎖,不斷去唔俾你做呢樣,唔俾你做嗰樣。喺我嘅印象之中,佢哋連電䐉game都唔俾打,social media唔俾用,但當然我有偷偷地用啦,但朋友、同學呢啲嘢我從來都唔會攞出嚟同佢哋講,因為我知道無論我講親啲乜嘢都好,有九成嘅機會係會俾佢哋叫自己呢樣唔准嗰樣唔准。所以我嘅童年就係咁,有啲咩事就自己一個人處理,而呢種嘅處事方式係從來都冇人教過我,只係一路從自己失敗嘅經驗入面學習返嚟,可能正為呢種處事嘅方式係由我自己摸索出嚟,所以做起事上嚟會有好多唔成熟嘅地方。旁人見到我咁樣嘅處事方式,可能會覺得我好獨立,而事實上呢個都的而且確係其他人對我嘅印象嚟,但或者係因為多年嚟所謂獨立嘅行事作風已經令到我好疲備,而造就出一個好容易依賴人嘅性格。童年呢一回事喺我嘅人生都可以係話冇存在過咁滯,其實我都唔知道童年應該要係點樣樣,但我淨係知道當其他人嘅父母帶緊佢哋嘅仔女去邊度玩邊度旅行,我嘅父母就係喺度打緊仔,而我嘅童年就係喺打罵之中渡過嘅,而嗰種恐懼嘅陰霾其實從來都冇離開過我。

我諗正係童年嘅呢啲經驗令到我會有dysthymia,咁咩係dysthymia呢,中文叫持續性抑鬱症。簡單嚟講就係個人長期都down,其實我一直都係咁嘅狀態,到上年八月真係開始有啲嚴重咗喇,先真係去睇醫生,先知道原來我都係一直被情緒問題困擾。而嗰種冇方向嘅感覺,社交障礙、選擇困難呢啲,我以為係我性格嘅一部份,但原來係一種mood disorder嚟。

再之後嘅時間,嚟到同年十月,發生咗啲事啦,有睇開呢個blog嘅人都知道係啲咩事嚟㗎啦,咁佢就直頭變埋Major Depressive Disorder,但當然,本身有dysthymia嘅人係會容易啲出現MDD,而前日睇完公立嘅psychiatry,個醫生話,咁你要解決咗呢一件事先,咁你個MDD先會好到。咁其實我都知,我都試過好多唔過嘅方法啦,有第三方介入過啦,但都依然係解決唔到件事。如果係解決到嘅話,我諗早喺十世之前已經解決咗呢個問題。

或者唯一能夠做嘅,就係接受呢樣嘢會跟我一世嘅現實。