生命是借來的時間

今日碌IG,見到一個咁嘅文題,想借題發揮一下。

人生苦短,世事無常。一堆有機化合物撞埋一齊,勢估唔到,生命、意識,就係咁樣隨之而嚟。生命嘅出現的而且確並非偶然,而呢一堆有機化合物如果能夠成為一個健康嘅人類的話,喺概率上而然,真係一件幸運嘅事,以我作為一個例子,就係一個精神健康唔健全嘅例子,而其他平凡人對我哋嚟講,的而且確叫人羡慕。

睇過一套戲,名叫《我的五步男朋友》,但我個人認為台灣嘅譯名《愛上觸不到的你》就更為凖確。戲中兩個主角同一個主要嘅配角都患有同呼吸系統有關嘅疾病,一生人都同醫療嘅程序、治療係離唔開,而佢哋活命嘅方法,就只係有靠其他有心人捐贈嘅器官。每當其他人死之後,佢哋先能夠有機會延長自己嘅生命,去做佢哋尚未完成嘅事。由呢一點睇嚟,其實我哋每一個人所擁有嘅時間,都只係向其他人借返嚟。我哋嘅大氣、生活嘅星球、我哋所擁有嘅物質、甚至其實連組成我哋身體嘅原子,都係只喺呢個世界入面借嚟,而我哋死後並唔能夠帶走呢啲有形嘅物質,當我哋走之後,唯一會跟住我哋走而唔會再留喺呢一個世界上面嘅,只有回憶。人生苦短,一個人嘅壽命頂多就只有一百幾十年,而一百幾十年喺宇宙嘅尺度嚟講,絕對唔係咩長嘅時間,閒閒地一個太陽就已經有成一百億年嘅預期壽命。

 

而我哋喺呢一段借嚟嘅時間入面,所能夠做嘅就只有盡量製造多啲唔同嘅回憶俾自己,因為我哋唯一喺呢段借嚟嘅光陰入面所能夠賺取嘅,就係回憶。試諗下,其實任何其他嘅人喺你身上都攞唔走屬於的嘅回憶,而其實回憶亦係組成我哋人格,或者叫做「今天的我」,最大嘅部份。

難得人生一場,其實我哋嘅生命入面並冇啲乜嘢係我哋自己能夠好好控制,而唯一能夠做到對自己好嘅事,就係盡量製造更多美好嘅回憶俾自己留下。