關心你身邊嘅人

有留意相關報道嘅你都應該會知道其實自從舊年六月開始,由反送中運動入面我哋見到現實制度汙腐嘅程度,好多人擔心香港嘅前途、自身嘅安危,今日唔知聽日事,身邊嘅朋友可能會無啦啦俾人拉、間屋可能會無啦啦俾人燒咗、而面對日益收窄嘅「言論自由」,你自己都隨時會俾人拉,更莫講係話嗰啲龍門任佢搬嘅法例,明明話咗係合法嘅嘢都可以無啦啦衝出嚟話唔合法跟住走去亂咁拉人,其實都真係人人自危,而正因為呢啲不明朗嘅情況,其實香港已經講緊有講緊成三分一嘅人口有出現PTSD(創傷後壓力症候群)嘅症狀啦,亦有超過一成嘅人有出現depression嘅症狀1,正因為咁,如果大家情況許可嘅話,都盡量關心一下身邊嘅人。

其實我自己都算係一個情緒病嘅患者啦,雖然唔係咁貼切,但我大概都好明白depression患者嘅感受嘅。其實我認為其實情緒病嘅患者某程度上需要嘅其實可能係好單純嘅陪伴就已經好足夠。當然如果未真係咁困擾吧時候佢哋自己係會求助,但當去到令到個患者好困擾嘅時候,往往都唔會再主動尋求協助,甚至會抗拒外界嘅協助,去到嗰啲時間都可能已經太遲。所以趁有機會,就關懷下身邊嘅人啦,相信無論係邊一個都好,一生中總會有啲日子會有情緒支援嘅需要,人生無常,你永遠都唔知道下一刻會發生啲乜嘢嘅事,呢一刻唔伸出援手嘅話,你都唔會知下一刻仲有冇咁嘅機會。

當然對住啲三唔識七嘅你唔會去關心佢哋,又或者係有啲人你唔會想關心佢哋啦,咁嗰啲人咪好似我咁自己一個面對呢啲壓力囉。

睇到一條YouTube片講壓力,有感而發。

最近嘅日子對於每一個香港人嚟講都係好難捱,一定要撐住,先能夠見到成功嘅一日。雖然我就未必有咁嘅福氣。

  1. 香港病了 1/3人口罹患創傷後壓力癥候群