2019年最後一個月 亦係最頹廢嘅一個月

2019年嘅12月所發生嘅實在係太多。當然呢個月入面所發生嘅嘢其實同之前嘅日子都有啲闗係啦。

講返發生咩事先,好多識我嘅人喺最近都知道咗我有depression啦,不過呢樣嘢我都唔怕人知,因為我覺得其實其他人就算知都唔會有咩discrimination嘅嗰啲嘢做到出嚟,但我都想其他人可以了解多啲呢個所謂嘅「病」啦,因為其實好多人主要係唔識同有depression嘅人相處而可能覺得佢哋係有特別需要咁要優先照顧咁,prejudge咗佢哋係會情緒勒索其他人嚟達成自己嘅目的咁。我唔否認有時候係真係會用盡一切嘅手段嚟去達到人際上嘅目的嘅,但其他範疇嚟講呢,我就冇咁嘅精力同時間去做啲咁嘅嘢。以我為例,其實自己喺呢段時間入面其實最睇重嘅就係人際關係,亦都係因為睇呢樣嘢睇得太過重而令到自己行咗去一個冇回頭路嘅深淵入面。

先講返自己,其實我喺呢個月入面都黽係翻咗大約佢4-5日學左右,咁其實係咩事呢,其實主要係因為我自己今年Q4嘅時候心情都好似係一直喺一個比較低落嘅位置啦,個人真係好冇動力,見我咁耐冇update過個blog就睇得出。翻學,又冇心機去上堂,又會見到自己俾人搞marginalisation,一個二個爭住同我割蓆,咁嘅狀態,仲要每一都面對咁嘅嘢,其實唔好話係我,我覺得任何一個人遇着啲咁嘅嘢同樣都係會好似我咁panic。踏入聖誕嘅日子,終於叫做正式咁開始放假,但每日嘅routine就係朝早一早起咗身啦,但又冇動力去做任何嘢,同逃避現實一樣,一起身就走翻去繼續瞓過,重複一次、兩次、三次⋯⋯直都自己真係頂唔順咁,先會真係起到身,仲要因為每晚都依然發好多好多嘅夢,搞到我日日都係瞓完好似冇瞓過咁嘅狀態,每日真正起到身嘅時間冇一日係早過十一點,一般嚟講仲要喺十二點之後先起到身,咁嘅樣,真係橫睇掂睇都唔覺得會點樣有動力法。至於瞓呢,其實我都好想瞓,每日十一二點嘅時候都會用Benzodiazepine嚟稍為放鬆自己嘅心情同幫助自己瞓覺咁啦,有趣嘅係咩?就係我每日都要去到朝早五點先有睡意,大佬,我瞓又唔係,起身做嘢又唔係,咁你想我點先。

其實我都有安排啲嘢俾自己去做㗎,-好似去邊度邊度玩呀、影相啊咁,但最失敗都係自己嘅動力始終都係唔夠,永遠都係臨門一腳先會發現自己咁嘅狀態根本乜都做唔到。明明有好多嘢係自己想去做,但偏偏喺呢段期間我就完全冇動力去做任何嘅嘢,真係覺得有啲失敗。

其實我喺兩年幾之前係已經有啲咩心口痛呀嗰啲depression嘅特徵㗎喇,不過其實自己又冇試過從呢個方向去諗過,依家諗返其實同自己嘅可能係學習能力高咗都有啲關係。畢竟以前嘅自己讀書都唔係嗰批可以去到頭20%嗰啲人嚟,但自從嗰年可能自己俾到自己一啲壓力,令到個成績先叫好啲。不過我個depression最初其實係喺家庭嗰個方向度嚟,但因為當時個depression都唔算嚴重,所以反而可以帶到啲正面效果出嚟。

但係喺近呢三個月嚟因為我自己都有啲唔係咁愉快嘅嘢發生咗啦,所以呢個keep住喺度潛伏咗好耐嘅depression就快始嚟料了。冇動力啊、失眠、工作效率低呢啲就真係好基本,差唔多個個depression患者都會經歷呢啲事情。但我嘅工作效率已經係低到接近乜都做唔到咁。食慾又係啦,一時會好唔想食嘢,一時又不停咁食,連我自己都掌握唔到下一秒會係點樣嘅情況。

同埋就因為嗰件事件時至今日我都形容為尚未解決啦,所以去到今時今日都仲係帶緊好多問題俾我啦,令到depression帶嚟嘅影響無限咁放大咗。每一日都會喺個腦入面係咁loop呢件事,去重新分析一次件事啊、思考返過去所發生過嘅事,去不停嘗試搵出事件嘅真相。不過其實都諗過咗多次、諗咗咁長嘅時間,就會發現期實真相呢樣嘢一早就失咗踨。而當你個大腦日日都係唔肯放過自己嘅咁,日日都逼住自己去諗呢啲嘢嘅時候,諗返起以前開心嘅回憶,再對比而家,俾人粒聲唔出咁割咗蓆,真係都仲會好hurt好有嗰種「痛」嘅感覺。不過隨着時間流逝嘅係,個心越嚟越攰,攰到嘅程度係明明一啲嘢係好傷心令到自己好想喊出嚟嘅,都己經攰到唔想再喊,呢種嘅感覺就好似自己去feel嘢嘅ability俾人takeover咗。失去咗感覺嘅能力,咪變咗日日喺度黑口黑面咁,因為感受呢樣嘢早就死咗。

無可否認,呢段期間的而且確係有開心嘅事發生過,但喺呢段日子入面對於䦒心呢樣嘢好似有新嘅解讀。以前以為開心就好單純係開心,但我最近先發現,其實係人將自己嘅喜悅向其他人分享先會得到快樂。當你嘅喜悅係要藏在心入面,冇一個可以俾你分享嘅對象嘅時候,你嘅喜悅只會被轉化為空虛同埋孤寂,即係同你身邊缺乏一個可以同你分憂嘅、互相可以分享到喜悅嘅人的話,無論你嘗試去做啲咩嚟去令自己開心,都只會係白費氣力。

自己另外一樣會驚嘅嘢就係好擔心如果自己嘅思考能力係從depression嗰度而嚟嘅話,假如真係醫得好嘅話,會唔會隨之而消失呢?

一單嘢,拖咗成四分之一年,其實自己已經覺得好exhausted同panic,對未來會有擔心啦,唔知真係返翻學嘅話,啲人會用咩眼光嚟睇自己呢?個marginalisation係咪仲發生緊呢?我同佢之間嘅呢一件事,仲有冇修補嘅可能性呢?雖然老實講我就唔抱太大期望嘅,因為每一次嘅期望都只會變成自己嘅失望。唔想令自己一次又一次咁去受傷。

加上呢件事到依家都係懸而未決啦,其實佢日日都會令到我有好多嘅emotion induced咗出嚟。同埋依家自己都唔會同人講,一嚟就係講到口都臭,二嚟就係覺得其他人根本冇可能幫到自己,不如將啲問題留返俾自己一個好過。無謂煩到其他人,人哋根本冇責任要幫其他人解決到佢哋嘅問題,同埋都廢事影響其他人嘅心情。同埋好主要都係唔夠信人,都依然好驚人哋會幫真實嘅自己落好多嘅標籤俾自己。

最後講返,好多有mood disorder嘅人係特別重視人際關係,唔係全部人,而一般而言都只會係一個人,算係對嗰個人特別依賴。唔知我係BPD定係其實都係depression入面嘅一啲症狀,有個連登Post有提到BPD嘅患者係會用盡一切方法去留住個段關係,以我個人而言試過send千字文嗰啲嘢啦、自殘、自殺都唔係未試過。唔怕講埋就係我兩次入院都係因為suicide attempt而被人送入去啦。(至於點解會俾人發現呢?我都好有興趣知)

有抑鬱同bpd 你問我答 #14

BPD一般嚟講都係唔識同人建立健康嘅關係,好多時源於經歷家庭嘅創傷或者背叛,比如離婚咁。BPD嘅人格無問題,係同人建立關係同對自我嘅價值好低出左狀況。

呢個comment其實真係講中晒我,建立一段關係,其實可能對好多人嚟講好容易,但事實上係我根本連踏出第一步之前已經有好多猜想,例如可能對方會點樣睇自己嗰啲,所以我自己根本唔會主動同人撘訕、識人,所以會特別重視自己現有而可信任嘅關係,而我嘅情況係好死唔死你最視嘅嗰個人話走就走。

  1. 無法忍受被人拋棄,一旦發生,會有激烈反應。
  2. 有自我認同障礙,自信心低或過度自信,因此影響人際關係。
  3. 情緒低落時,會有自我傷害及放縱的行為,例如:飆車、瘋狂購物、傷害他人的衝動。
  4. 會藉由輕生、自殘等威脅他人不得結束情感關係。例如:情殺。
  5. 情緒失控時,憂鬱、焦慮情緒會持續數小時。
  6. 害怕孤單,經常有空虛感。
  7. 在瞬變中,出現與壓力有關的妄想,或嚴重解離現象。

所謂情緒勒索就係會用盡一切嘅辦法嚟留住佢,但估唔到呢一次真係留唔住,對我而言其實真係致命打擊嚟。

依家個人嘅身體Physically勉強叫個仲生存緊,但個心可以話已經俾人扼殺咗。

不過佢都未必知我仲有BPD啲Symptoms。我未見到相關嘅Post之前都唔知,去到依家先發現同分析返自己啲行為,至發現自己中咗BPD嘅Symptoms。

下次去覆診再問下。

如果佢知我有BPD,佢又會唔會返嚟呢?

係,走係佢嘅權利,但有冇人考慮過我有以上列出嘅問題同風險?冇,因為根本冇人當過我係人,只係一個可以用嚟過橋嘅工具嚟咋嘛。

 

Ref:

  1. 有抑鬱同bpd 你問我答 -- https://lihkg.com/thread/902100/
  2. 邊緣性人格障礙 - 維基百科 -- https://zh.wikipedia.org/wiki/%E8%BE%B9%E7%BC%98%E6%80%A7%E4%BA%BA%E6%A0%BC%E9%9A%9C%E7%A2%8D