廢老思維：不思進取

香港20至30年前曾經都係亞洲地區最有競爭力嘅地方之一，有唔少令人譁然嘅新科技，但時至今日，呢啲所謂「新科技」有冇進步過呢，據我睇嚟就冇喇，咁其實問題出自邊度？其實就係香港啲廢老。（支持中國大陸政權嗰啲人特別容易自滿，咁都難怪嘅，乜都「厲害了我的國」，係好難有嗰種謙卑學習嘅心嘅。）

香港20年前推出八達通，令全球爭相仿效呢種儲值交通IC卡，但去到今時今日，全球都已經用手機NFC/Contactless信用卡做公共交通嘅收費方式，香港？咪就係好似20年前咁「先進」囉，仲係用住張20年嚟都冇改變嘅卡，當然，其實好多人已經嘈緊點解八達通唔好似日本Suica咁同Apple Pay合作，而係同Samsung Pay合作（Apple Pay喺香港市場佔有率較高），當然呢個都唔係重點，而係有一班人話「呢張卡都不知幾方便，洗乜用手機/Contactless信用卡），其實即係咁，科技嘅嘢，日新月異，同學習一樣，不進則退，今日你唔好好改進你現有「先進」嘅科技，隔多一年半載，已經係落後，呢個道理真係咁難明白？

然而，每當有人談及外國或者鄰近地區嘅各種創新科技，佢地總係會先踩低嗰度，抬高自己，甚至話「我地中國不知幾勁⋯⋯」，當面對其他人俾自己好嘅嘢嘅時候，只係用一個妒忌嘅心態面對，甚至係自抬身價、自命不凡，難怪呢個城市喺多年嚟都冇進步，都係因為廢老們思維模式嘅問題。

人唔能夠終身學習，能夠保持自己嘅競爭力嗎？英文各大權威字典字庫每天都更新，假如你40年前就停止學習，你覺得你會能夠唔跟時代脫節咩？現實社會就係咁㗎啦，整個世界不斷變遷、進步，當如果你唔好好學習其他人值得學習嘅地方，而不停話人地點樣「水深火熱」，蒙受損失嘅，只會係自己，同埋身處喺廢老主導地區嘅無辜人民。

要令自己嘅城市、國家保持競爭力，最重要嘅都係保持謙卑學習嘅心態，學習其他人值得我地學習嘅地方，而唔係一味喺度踩，因為你嘅奚落係冇意思㗎，地球繼續自轉，人地繼續進步，咁樣嘅時候，落後嘅，只會係你自己。

希望各位廢老們，如果見到呢篇文章，可以好好咁反省一下自己待人處事嘅心態。唔係凡事都係「厲害了我的國」㗎，應該好好認清呢個世界嘅情況，認清楚天高地厚，而唔係只係識得順從愚民政策。請你地記住，世界唔係為你而轉，而係每個人都應該要因應世界嘅改變而改變。