一睇標題，就知道其實大家真係對國籍呢個概念有好多嘅誤解，當然最常見就係標題所寫嘅一個。

血統主義與屬地主義

筆者就曾經被好多人問過一個問題：「你點解揸葡萄牙Passport嘅，你喺嗰度出世？」，當然我有可能喺葡萄牙出世，但其實對我嚟講並唔會影響㗎喎。因為其實葡萄牙喺1981年已經由屬地主義轉為血統主義，而作為一個00後，我嘅國籍好自然就係因為血統而嚟。

咁咩係屬地主義？咩又係血統主義（又稱屬人主義）呢？其實好容易理解：屬地主義就係任何一個人喺嗰度出世，就能夠享有嗰度嘅完整公民權、國籍，香港就係一個好好嘅例子，因為香港行屬地主義，所以只要有任何人喺香港生仔，佢嘅子女都一定會係中國籍，亦會取得香港永久居民嘅身分。相反，血統主義即係代表國籍嘅取得除咗移民以外只有憑血統取得嘅途徑，例如喺大部分歐洲國家出世嘅人，只有父母有該國國籍嘅人先能夠取得該國國籍，否則就會變成無國籍（Stateless），而要父母去領事館做翻相關嘅出生轉錄先能夠離境。

基本上依家大部分國家都係行血統主義㗎啦，除咗美加呢啲移民國家仍然係使用屬地主義。

護照到期=國籍失效？

好多人以為喺護照到期日之後好耐都冇renew本passport，就唔能夠申請該Passport，其實就唔係嘅，Passport嘅到期日同你個國籍係完全無關嘅，當然，Passport可以作為一種證明你有該國籍嘅文件，但到期日並不重要，因為國籍係終身跟住你嘅，除非你主動放棄或者係因為違反該國法律（例如該國唔容許雙重國籍或者係宗教問題）而被取消國籍。因此，只要你肯定該國政府嘅系統入面有你嘅紀錄，就能夠重新申請本Passport。

然而，好多人以為有其他國家嘅國籍就會自動取締咗中國籍，咁你就諗多咗，雖然中國法律上唔容許雙重國籍啊，但中國嘅法律從來都俾當權者ignore㗎啦，同埋假如佢地主動取消你嘅國籍，佢地就唔能夠揸正旗號監視已經有其他國籍嘅人㗎啦喎，咁你諗下邊個蝕底啲啦，所以記得自己放棄中國籍啦，而入境處就話有機會影響香港居留權嘅，不過呢個地方已經全面赤化晒，都再冇留低嘅理由啦。要救一個地方，先要確保自身嘅安全嘛。

 

仲有咩唔明都可以留言/Facebook問我嘅，可能就第日再開Po講過啦。