首試港珠澳大橋——假日不了

話說我琴日(7號、年初二)去咗用港珠澳大橋由香港去澳門再由澳門返香港,點解我會用呢條橋呢?只係因為平同埋唔趕時間囉,趕時間嘅我都穩陣起見搭返船啦。

有圖有真相啦,我就真係去咗呢度嘅。

咁我點去呢?喺屋企搭A車去呢個港珠澳大橋香港口岸旅檢大樓,我就住九龍嘅,用1個鐘頭左右到,同我搭巴士去港澳碼頭差唔多。

入到去,過關個陣都冇乜人,一過咗關,就見到一條好很長嘅人龍,仲要都頗混亂下,我喺呢個時候仲見到有篇新聞話港珠澳大橋香港口岸秩序大致良好喎,即刻嬲咗。

我12點49分買咗飛即刻去排隊,去到1點35分先見到㗎巴士。1點四十幾分先上到㗎車。過程中其實都幾穩定嘅,同埋因為係赤臘角嘅關係其實都見到幾多飛機嘅。

睇返啲相嘅時間呢,我就2點22分就到咗澳門口岸,大約耗時40分鐘左右嘅,一入到去就聞到真具中國特色的塞屎渠味,勁臭。

咁我係用澳門居民自助過關通道啦,冇人排嘅,幾分鐘會有一兩個人用咁樣,過關都係用咗10秒左右啫。

然而,訪澳旅客無論人手Counter定係自助過關通道都非常多人,保守估計排大約十幾分鐘就得。因為我係嗰度等人都等咗十幾分鐘。

返嚟香港嗰轉呢,就快好多嘅,澳門口岸嗰邊完全冇人排,買飛到上車都唔知洗唔洗5分鐘,不過呢,澳門嗰邊過關要做具有中國特色的安檢,咁大家明白㗎啦,如果喺澳門返就起碼要有兩個人一齊先好帶背囊手袋嗰啲過關,畢竟啲人係將啲袋亂咁放,陣間混水摸魚偷咗你嗰個就喊都無謂啦。

回程就慢過由香港去澳門啲嘅,但速度都還可以。起碼10點05分喺澳門過關,都未到11點已經返到香港。

繼續都係搭A車返屋企,可能因為夜晚嘅關係所以冇人中途上車,所以好快就返到屋企,大概係半個鐘多啲啦。

結論

中國假期嘅時候真係唔好喺中午用呢條橋過海,包你等到懷疑人生。夜晚冇人就非常好啦,平過搭船又快過搭船兼定過搭船。中國有假期嘅話你用呢條橋嘅話,你起碼預早三五七個鐘嚟等車啦。

btw 其實金巴間公司有官網可以俾大家Check要等幾耐,不過好可惜,喺我要Check嘅時候佢個網冧咗,哈哈哈。