3南韓漫遊SIM卡——終於高速少少

唔知大家有冇睇過筆者之前去台灣用3漫遊卡嘅中伏Post呢？但其實睇完另一Blogger去日本嘅伏SIM Post之後我都覺得其實3唔係好伏😂。於是，筆者喺去年8月嘅時候繼續抱住試伏嘅心態，再次購買咗3香港嘅南韓漫遊卡去試試佢。

呢張卡係3推出嘅南韓漫遊卡，香港似乎用唔到，去到南韓嘅時候就係漫遊去SK Telecom，南韓距離香港都有一段時間，所以速度嘅lost都應該比較大。

文章入面出現Wi-Fi標誌嘅係透過Netgear AirCard AC810（港版 aka 歐版）分享張卡嘅訊號俾電話

而直接出現LTE標誌嘅就係透過iPhone 6s Plus 港版嚟進行嘅LTE連線

呢張就係一落機啱啱喺南韓仁川機場到埗嘅時候做嘅Speedtest，亦係咁多次之中最高速嘅一次，既然連漫遊卡都有約60Mbps 嘅速度的話呢，相信仁川機場本地4G都有返相當嘅速度。（對比香港嚟講就效果非常理想啦，因為當期時我都係用緊SUN Mobile，最高速度都只係得21Mbps所以算係咁上下啦。

呢次測速冇記錯就係喺龍仁市，錄得都有約40Mbps嘅表現，遠比上一次台灣漫遊卡嘅表現好好多！

之不過呢，自此之後就再冇錄得過高速了。睇返紀錄呢，相信呢個係喺義王市做嘅Speedtest嚟，但速度都係Keep住徘徊喺10Mbps。

另一次喺義王嘅Speedtest就係9.16Mbps Download同1.33Mbps Upload。

入咗首爾之後個下載速度一直都係Keep住喺呢個位左右，上載方面嘅表現就比較差，有時候連1Mbps都唔夠，雖然普通send下text message都應該夠用嘅，但一send圖就應該瀨晒嘢。

同場另一次嘅Speedtest結果係8.86Mbps Download同5.69Mbps Upload。

呢次嘅Speedtest冇記錯呢就係喺TrickEye Museum門口附近做嘅Speedtest嚟，上載嘅表現終於好返少少，Download嗰度都係Keep住喺10Mbps度徘徊。

同日喺首爾市區都Test過有一次有13Mbps Download同11.8Mbps Upload嘅表現，似乎呢張卡嘅效果都唔錯。

呢張卡嘅感覺俾到我至少唔係一個伏嚟，曾經Speedtest到有超過50Mbps嘅漫遊表現，我都覺得算係咁，不過係市區嘅速度慢，到底係關3香港事？還是南韓SK Telecom方面唔夠Bandwidth分或者係QoS嘅影響呢？咁我就唔知道喇。當然都有可能係因為我用一部600Mbps 3CA規格嘅Wi-Fi蛋收同一部得2CA 300Mbps 規格嘅電話接受所導致嘅差別，不過其實我咁樣插都係逼不得已，因為隻Wi-Fi蛋10個鐘左右就冇電，加上佢Netgear叉電方面Bug Bug地，喺70%以上嘅時候插電就冇反應，唔能夠用尿袋長插，所以先要轉device。

產品來源：自資購買

售價：$73

購買渠道：3香港實體店