iPhone XS用後報告

話說我喺12月底由iPhone 6S Plus升級咗去新嘅iPhone XS(唔係Max)。至於點解呢,我就有幾個原因可以講嘅。

  • 發熱。三星代工A9處理器大家都知咩事,熱得嚟又晒電
  • 相機壞。去完南韓之後個相機入晒霧又瘋狂震,乜都影唔到
  • 慢,好慢。因為佢得2個核心(好似係)嘅關係呢,而時脈亦都唔高,每次打機都會Lag啦,換App嘅時候一定會彈App

如果大家已經上咗一定嘅年紀嘅話,只係會普通IM上網呢,iPhone 6s Plus都依然係好適合各位,但對於我嚟講,就顯然係唔夠效能。

咁所以我喺12月嘅時候決定咗換iPhone XS。但我只會分享下我用咗個半月以嚟嘅心得。嗰啲乜嘢開箱呢,由於都推出咗一段時間㗎喇嘛。開箱文求其Google入「iPhone XS Unboxing」都已經有十九幾萬篇,內容都係千篇一律,咁我就唔會做㗎啦。

效能

新嘅呢部iPhone XS真係好快,開機以前要成分幾兩分鐘,依家三十秒都唔知需唔需要。同埋如果你有打Online game嘅話呢,你會發現自己永遠都係最早入場嗰個(的而且確,A12處理器效能只遜於A12X,流動處理器嚟講)

另外,今次嘅iPhone有4GB RAM,較我以前嗰部嘅2GB嚟咗個double,彈App問題都冇再出現過。

同埋由於Apple喺A11嘅CPU開始可以6個核心同時使用,背景任務(例如通知)會被分派去節能核心上面完成,所以彈通知會導致Lag機嘅情況終於唔再出現了。

外觀及設計

由於iPhone XS前後都係玻璃嘅關係,加上側面係鏡面嘅不鏽鋼,其實真係幾靚,只不過係真係非常容易沾上指紋。同時,鏡頭由於突出幅度都比較大,面積又大,唔用保護套都應該幾容易花,同時,就算你用咗保護套都好,都好容易撳咗落去或者係唔小心掂到鏡頭嘅位置而導致鏡頭會污糟咗嘅。至於M字額呢,個人覺得還可以,只不過有時候睇圖會俾個M字額遮住咗部分細節(特別係如果你影相會影字、影Notes),希望蘋果可以喺未來嘅更新能夠容許使用者開圖可以拉低過個M字額。

操作

自從iPhone X開始,iPhone就開始變為使用手勢操作,取代本身嘅實體按鍵,個人就頗喜歡嘅,因為其實用手勢操作感覺全部workflow都快咗,拉一拉就已經可以開返上一個App、返Home、開Multitasking,至於Control Centre位置嘅改變呢,頭幾日係有少少唔習慣嘅,不過用多幾日就完全冇問題啦。另外,由於我自己係一個長期手指水氣都比較重嘅人,所以用指紋解鎖(即係以前Touch ID)嘅時候呢,往往係需要先抹下隻手或者係要打密碼先可以開機,所以用臉部解鎖真係幾方便我呢啲人。不過缺點係加入你面部遮擋少少(例如喺張床上面撳電話)或者係表情變動幅度大嘅時候就detect唔到你係你㗎啦。同埋喺我嘅測試之下呢,用FaceID嚟做Apple Pay,解鎖嘅成功率比起TouchID係高嘅,咁對我嚟講就係驗證Apple Pay所需嘅時間減少,就更加方便啦。

雙SIM卡

其實雙SIM卡都應該唔係一件難事,但唔知點解Apple咁多年嚟都唔肯出,取到今代終於出咗。雙SIM卡確實係幾方便,特別係我有兩個唔同地區嘅電話號碼,亦會經常兩地走,次次都要開卡槽換卡真係一件幾麻煩嘅事,依家終於冇咗呢個煩惱喇。但係都係有缺點喇,同一款機,能唔能夠同時推出雙卡槽又可以用到e-SIM呢,想用邊種咪你自己入到去再揀咪得,另外,由於部電話只能夠使用一張e-SIM,實在係幾可惜,因為可能我本地嗰張係一張e-SIM,但去旅行嗰張都可以係e-SIM嚟㗎喎,咁所以我覺得Apple應該俾用戶Flexible咁選擇用晒兩張e-SIM、e-SIM mix 實體卡槽或者係兩張實體卡。

Mon

今代個Mon由於係用OLED喇,所以個對比度就較以前嘅iPhone都高,咁我睇一啲高動態範圍嘅影片嚟試過呢,顏色的確係幾Sharp,對比度亦都係非常嘅高。但由於OLED係每粒pixel自己發光呢,反而我有少少擔心做得多System Update或者係開閂機多會導致個mon出現燒印。咁唔知Apple會唔會針對呢樣嘢做影相平移嚟去減低出現燒印嘅機會啦,呢方面就有待iPhone X用家解答了。

結論

我自己都幾滿意呢部機,雖然雙鏡頭呢個功能我都比較少用到,但其實真係需要用起上嚟就真係幾好用。呢部機我覺得係對於一啲對效能有要求嘅人去用,如果你只係會用IM、上下網、聽下歌,我覺得真係唔需要換新機,否則只係大材小用。