入籍：重新申請各種文件

話說呢根據葡萄牙法律規定呢，所有文件都需要喺180日之內發出，所以我就要喺出生登記處嗰度重新出過個核證副本。

咁需要幾多錢出呢張嘢呢？呢張嘢需要$140嘅，然而張出世紙嘅格式可能同你本身嗰張嘅格式有所改變，中英排序、字體等等都同當年嘅唔一樣。

新出嘅核證副本係會寫明發出呢張核證副本嘅日期，咁所以都冇得魚目混珠嘅。

咁需時幾耐呢？如果你出生嘅記錄唔係年代久遠的話呢，即係你出世嘅時候已經電腦化晒的話呢，你最快係即時攞得到，但若然係手寫嘅話呢，根據翻政府網站所寫係需要九個工作天嘅（大約兩個星期），咁你唯有等下。

點解要申請出生證明書嘅核證副本？以葡萄牙爲例，此舉嘅目的係要用嚟做出生轉錄，將你（申請入籍的你）、閣下父母（如果葡萄牙領事館或者本身葡萄牙方面冇記錄的話需要一併轉錄）嘅出生事實登記於葡萄牙當局，當佢地有你出生事實嘅資料，就知道你係葡萄牙公民所生嘅子女，就賦予閣下國籍，理論上唔會失敗（除非閣下申請時已經17歲又或者運氣差到極點），當然文件交齊、一早申請好晒顯示你嘅誠意都可能會提升你成功嘅機會。

順帶一題，（申請時）過咗17歲仲入唔入到葡國籍？首先釐清一下點解要17歲前，因爲葡國領事館嘅職員話：文件去到葡國需要一年時間，當你到葡國手上嘅時候已經年滿18歲，基本上都唔會通過到呢個方法取得，但可以用另一個方法。咁如果真係咁不幸超過17歲的話呢，就係通過歸化嘅方式嚟取得葡萄牙國籍喇，歸化其中一個大挑戰就係葡文試，即係要識葡文，不過筆者只係識睇同寫少少字，寫句子我就唔識㗎啦，但又葡文譯出嚟都還可以嘅，當然，係越早做，成功率越高啦。