入籍：去攞登記事項證明書

首先，乜嘢係登記事項證明書？我諗大家一聽到都會覺得一頭霧水，都唔知講緊啲乜，我最初喺葡國領事館收到呢張嘢嘅時候都諗緊呢張係咩嚟，喺Google search過一search，其實登記事項證明書就係用嚟證明其身份證紀錄上已登記的事項，例如：姓名（包括以前曾經使用過嘅名，即係改名嘅記錄）、住址、出生日期及地點、婚姻狀況同埋配偶姓名等。

咁攞呢張嘢嚟做乜？我諗應該係領事館方面用嚟證明你所遞交嘅文件都係你本人同埋核實翻你個名同領事館嘅記錄一樣。

好喇，咁講解完咩係登記事項證明書，咁申請嘅時候有咩要注意？

1. 留意翻要你申請呢份文件嗰個國家要求你提交咩語言版本，以我爲例，葡國領事館要求我攞嘅係英文版登記事項證明書，一定要啱語言否則領事館不受理，浪費時間之餘亦晒咗$425，所以一定要小心。
2. 如果申請人未滿18歲（我嘅例子）係需要影印3樣嘢，分別係自己嘅身份證、特區護照（如果冇持有特區護照我唔知需唔需要另外申請）以及委託人（即係父母其中一方）嘅身份證遞交俾人事登記處

申請期間，入境處嘅職員會問你做咩要申請呢張嘢嘅，我諗大家都唔會得閒無聊整張咁嘅嘢放喺屋企展示嘅，所以如果有問到嘅話亦請如實回答（同時亦有可能影響所發出嘅登記事項證明書嘅語言），當中你嘅理由係需要填寫喺申請表嘅C Part 嘅理由欄上。不過都毋須特別美化，如實填上就可以。

我今日申請咗，咁幾時有得攞？一般政府嘅文件可以喺9個工作天（約兩星期）攞得到，但呢個就異常地耐，亦我爲例，今日申請，（最快）要4月26號先有得攞，所以其實建議大家預早40日。

以上係小弟少少申請登記事項證明書嘅心得，可能每個人都有不同，歡迎喺呢度或者去Facebook 留言去集合大家嘅情況

下次會分享更多關於入籍嘅事，下次再見 :0)