自由鳥派免費SIM 玩SmarTone 網絡
繼去年中國移動香港送出MySim之後，較早前香港電訊送Club Sim，今日SmarTone都唔執輸，SmarTone旗下品牌自由鳥喺1月29日上午宣佈推出本地SIM卡並且喺頭兩個月送出俾香港嘅居民（需要年滿11歲），而且隨卡附送5GB 21Mbps FUP Plan 俾大家免費用兩個月，可能比起Club Sim 更加吸引。
呢張卡送嘅係5GB 21Mbps FUP Plan，每個月嘅用量超過5GB之後會被限制速度至不低於128Kbps，每個月有1000分鐘通話時間，然而所有Plan 嘅優惠期都只係去到3月25號，過咗呢日之後就會用唔到，因此遲定早申請/啓用都唔會抵咗嘅。
申請嘅時候需要輸入姓名、身份證號碼、以及生日日期等確保你係已經年滿11歲，而每個身份證號碼喺優惠期內只能申請一張自由鳥免費SIM，不過，自由鳥派嘅呢啲SIM可以揀Number，對於儲值卡客嚟講真係好好（不論其他台門市賣嘅儲值卡抑或係之前派嘅免費卡都係冇得揀號碼嘅）。
首先，呢張卡你可以選擇以本地平郵嘅方式寄到你屋企，或者係選擇喺門市購買一張傲遊SIM嚟開通Free Trial 嘅服務，分別就在於需要俾錢同免費。
開箱收訊號
自由鳥SIM寄到筆者手上時嘅模樣
打開之後就見到自由鳥公司所提供嘅啓用教學
SIM卡拎落嚟之後嘅模樣，其實感覺有啲似SUN Mobile SIM 卡
卡背有一個QR Code 方便俾人做Activation
喺未啓用嘅時候放入手機係冇訊號嘅，但根據張SIM卡嘅ICCID，已經使用咗SmarTone嘅電訊商設定，代表呢張卡應該係用SmarTone嘅4G 網絡。
打開翻Birdie Mobile 嘅手機App，選擇翻「已登記？啓動SIM卡」一項
然後會要求你掃描卡背嘅QR Code或者自行輸入張卡Barcode 嘅嗰個ICCID
見到呢個畫面就開翻你嘅email client 等email 到喇
見到呢個email就click入條link度然後需要註冊一個Account
最後，Set 好咗Account 之後就建立埋個暱稱就搞掂
Activate咗張SIM卡之後重新安裝過張SIM卡就見到已經收到訊號，張卡嘅Carrier ID係Set 咗做Birdie，即係自由鳥嘅英文名（本來期望係出SMC HK嘅，因爲之前幾日曾經有人話係出SmarTone 個名，唔排除佢嗰張本身係自由鳥遨遊SIM所以就冇將Birdie 入落張SIM卡嘅晶片，唔排除往後推出嘅會寫入Birdie 做Carrier ID）
APN就可以保留系統預設值，System本來set嘅smartone已經上到網，唔需要作出任何更改
功能測試
VoLTE
試儲值卡識試一定試VoLTE，因爲儲值卡大多數都冇VoLTE服務，不過上次香港電訊派嘅免費Club Sim就有VoLTE 同VoWi-Fi (as known as Wi-Fi Calling)，係令人驚喜嘅。
結果我打咗去天文台嘅「打電話問天氣系統」度試，呢個時候係接收緊LTE訊號嘅
不過一撥號就落翻3G喇，即係呢張卡唔Support VoLTE
3/2更正:多番測試之後終於用到VoLTE
確保個Settings 係冇問題（Voz e dados 係葡萄牙文，即係英文嘅Voice and Data）
本來筆者以爲呢張卡主打Plan會有VoLTE，點知原來仲渣過Club Sim，真係有啲失望
VoWi-Fi
打開Wi-Fi Calling嘅設定頁面，嘗試打開個Toggle
結果送咗個錯誤Message 俾我，意思係話to allow calls on Wi-Fi through this account, contact SMC HK，簡單嚟講，即係用唔到。
4/2更新: 喺等候多時之後終於可以啟用到Wi-Fi Call功能
速度測試
筆者屋企就個個台都收得差㗎喇，csl都只係得1.5Mbps 速度，過2Mbps 已經好好
一打開Speedtest 個App已經見到係用緊SmarTone 嘅IP Address 上網（換言之即係Through SmarTone Network）
居然都有2.16Mbps 下載，喺筆者屋企嚟講又真係唔差喎。
IP Address呢
筆者上咗呢個專Check IP GeoIP database 同電訊商嘅網站之後都可以見到係SmarTone 嘅IP嚟。
結論
如果你係一個甚少講電話嘅人嘅話呢張卡對於你嚟講又唔差嘅，不過如果你要講電話嘅時候電話就會落翻3G，然而會令到你網絡嘅連線速度瞬間下降甚至中斷，而且VoLTE 嘅通話質素高好多，唔明點解SmarTone 唔開放，另外，VoWi-FI喺香港電訊嘅Club Sim都有開放予用家使用，又係唔知點解唔開俾用家。不過呢張卡嘅好處係可以揀Number，不過目前嚟講都係冇用，因爲自由鳥嘅SIM依家帶Number 走好似要$100手續費，但佢地早前喺Facebook留言話會開放MNP（流動電話可攜服務），未知是否屬實，就等完咗Trial 睇下喇。
7/2更新：原來自由鳥有得用VoLTE 同VoWi-Fi，咁其實唔差喎
產品來源：自行申請
費用：免費
利益申報：冇任何行銷費用、利益
